Endeleg var det klart for seriestart også for juniorlaget. Spenningen var også ekstra stor, då det var ”nabolaget” Eikanger som stod på motsatt banehalvdel. Det skulle også bli ein forrykande start på kampen, ettersom det sto 3-1 før kampen var ti minutt gamal.

Martin Ystebø fekk æra av å starte showet. Austrheim/Lindås rulla opp langs venstresida, og til slutt trilla Bjørn Harald Nævdal ballen til Ystebø foran mål, som banka inn årets første. Berre få straksar etter landa eit innlegg i beina til Jonas Buene, som fekk ein enkel jobb med å gi heimelaget 2-0. Eikanger svara så like etter, etter ein linjefeil i den bakre firaren. Deretter vart det litt roligare utpå matta, før det vart produsert eit par kjempesjansar for dei lyseblå, og til slutt kunne Bjørn Harald Nævdal igjen gi heimelaget ei tomålsleiing. Same Nævdal vart klippa ned på venstresida vel ti minutt etter, og frisparket til Are Førde gjekk rett i mål til 4-1. 5-1 skulle det også bli før pause, etter ein lekkerbisken av dei sjeldne. Bjørn Harald Nævdal ropa ut ønskelista si: ”Buene, chip!”, og Buene svara med å løfte ballen over heile bortelaget sin forsvarsfirar, før kula landa på skoen til Nævdal. Nævdal kunne så putte ballen i ope mål.

 

Det skulle ta lenger tid før ballen igjen låg i mål i den andre omgangen. Denne gongen var det Bjørn Harald Nævdal som lada kanonen, men skotet vart redda. Martin Ystebø var bra framme på returen, og kunne putte 6-1. Ikkje lenge etter skulle også Are Førde få sitt andre for dagen, då han sende ballen i mål etter eit innlegg. Førde var også mannen som skaffa heimelaget straffe vel fem minutt før slutt. Målvakt Ole Fredrik Fanebust var kjapp med å springe den lange strekninga over bana for å få ta straffesparket. Dette sette han også sikkert i mål, og noko så uvanleg som ei Fanebust-scoring var eit faktum.

 

Dermed enda seriestarten med ein komfortabel 8-1-siger, i ein kamp der heimelaget hadde full kontroll, men likevel ikkje imponerte nemneverdig.